JI ÇAPEMENÎ Û RAYA GIŞTÎ RE
(Rojnamegerên di bin çavan de demildest serbest berdin!)
06/05-2024
Îro disa em rojnameger bi nûçeya binçavkirina hempîşeyên xwe hişyar bûn. Di encama operasona navenda wê Amed de bi serdegirtina malan hempîşeyên me Nûrcan Yalçin û Derya Ûs hatin binçavkirin. Her çend ji aliye navenda polîsan ve sedemê binçavkirina rojnamegeran nehat aşkerakirin jî em baş dizanin ku armanca van êriş û serdegirtinan kirîmînalîzekirina pîşeya rojnemegeriyê ye. Desthilata AKP’ê û MHP’ê di salên dawî de zext û êrişên li ser çapemeniyê her ku diçe zêde dike, lê bi taybet jî tacîza darazê ya bi ser rojnamegerên kurd de her roj tê zêdekirin. Di operasyona hefteya borî ku navenda xwe Stenbol bû de 9 rojnameger hatin binçavkirin û ji wan 3 jê hatin girtin. Nûçegihanên Ajansa Mezopotamyayê (MA) Esra Solîn Dal, Mehmet Aslan û rojnameger Erdogan Alayûmat li dadgeha ku hatin darizandin ji ber nûçeyên ku çêkirine û bi raya giştî re parvekirine hatin girtin û ew avêtin girtîgehê. Di ketina girtîgehê de li ser Esra Solîn Dalê lêgerîna tazî hat ferzkirin û hê jî di hucreya yek kesî de tê ragirtin. Di operasyon û êrişên du salên dawî de herî kêm 40 kedkarên Çapameniya Azad hatin girtin. Ev operasyon jî bi vê armancê pêk hatiye. Tê xwestin rojnamegerên kurd bêdeng bikin û nehêlin pîşeya xwe pêk bînin. Li gel hemû zext û êrişan jî rojnamegerên kurd dest ji nivîsandina rastî û heqîqetê bernedan û dê ji vir şûn de jî li ber xwe bidin. Bi boneya ji gel re heqîqet bê ragihandin û hevalên me yên rojnameger ji girtîgehê bên berdan têkoşîna me dê her bidome. Em ji bo di nava hevkariyeke mezin û berfireh de xwedî li rojnamegeriyê derkevin bang li hemû rêxistinên pîşeyî û hempîşeyên xwe yên rojnameger dikin! Rojnamegerî ne suc e. Rojnamegeran serbest berdin!
KOMELEYA ROJNAMEGERAN A DÎCLE FIRATÊ (DFG)
